Mòru Bon Dia

Bo programa matutino di TeleCuraçao.
“Mòru Bon Dia” sin duda algun ta e show matutino lokal mas popular na televishon. Na 2002 Edward Heerenveen komo direktor di TeleCuraçao e tempu ei a bin riba e fabuloso idea pa introdusí un programa pa mainta ku ta informá, konsientisá i eduká pueblo di Antia i Ulanda riba tur sorto di tópiko. Asina e programa di televishon ku nos konosé awe komo Mòru Bon Dia a kuminsá.

Naturalmente un programa asina mester di un presentadó. Un presentadó ku konosé nos pueblo i ku por papia di tur sorto di tópiko. Asina produktornan a yega na Aileen Looman ku te awe ta e presentadó prinsipal i kara di Mòru Bon Dia.

Ku Aileen komo presentadó Mòru Bon Dia a kuminsá trata tópikonan manera polítika, spiritualidat, salú, kultura i arte di un forma informal i relahá. Aileen i su tim ta krea un ambiente pa bo sintí bo na kas.

Bo planta nashonal ta transmiti Mòru Bon Dia bibu i direkto for di den studio na Seru di Ararat tur mainta den siman, spesialmente pa abo. Pueblo di Kòrsou mes ta autor di Mòru Bon Dia, pasó e tópikonan ta sali for di komunidat. Ta un programa interaktivo, pasó abo komo televidente tambe por bèl i duna opinion, remarke i hasi pregunta riba e diferente tópikonan ku Aileen ta trata.

Mòru Bon Dia a entrevistá hendenan manera promé minister di Ulanda Jan Peter Balkende, artistanan manera Izalin Calister, Lionel Richi i hopi mas. Pa den futuro bo por spera mas tópiko skèrpi, fresku i informativo. Keda sintonisá Mòru Bon Dia i habri bo dia alegre.

“Mòru Bon Dia” ta pasa di djaluna pa djabièrnè di 6.30 ‘or pa 9.30 ‘or di mainta.
Idioma: Papiamentu
Presentadó: Aileen Looman